Emakume bat hil da gaur arratsaldean Lerinen, NA-122 errepidean izan den trafiko istripuan. Hildakoak 82 urte zituen eta Azagrako bizilaguna zen, eta beste bi emakumerekin batera zihoan autoan. Ibilgailua bidetik irten eta irauli egin da.

Foruzaingoak azaldu duenez, 17:00ak inguruan gertatu da ezbeharra, Lizarra eta Andosilla (Nafarroa) lotzen dituen errepidearen 17. eta 18. kilometroen artean, Lerin parean. Istripua izan duen autoa Lizarrako noranzkoan zihoan, bihurgune batean bidetik irten denean.

Nafarroako larrialdi zerbitzuek eskatuta, ezbeharraren lekura joan dira suhiltzaileak eta Foruzaingoa.

Hil den emakumea gidariaren ondoan zihoan eta ibilgailu barruan gelditu da harrapatuta. Suhiltzaileek atera behar izan dute autotik. Haren gorpua Nafarroako Auzitegi Medikuntzaren eta Zientzia Kriminalistikoen Institutura eraman dute, autopsia egiteko.

Beste bi bidaiariak anbulantzian eraman dituzte Lizarrako ospitalera. Gidaria da bata, 48 urtekoa; bigarrena, autoaren atzealdean bidaiatzen ari zen. Hildakoaren ahizpa da, haren adin berekoa, 82 urte ditu baita ere.

Gidaria harekin zihoazen adineko bi emakumeen zaindaria da, eta alkohol eta drogen kontrola egin dio Foruzaingoak. Emaitza negatiboa izan da.

Azken lau egunetan, Nafarroako errepideetan izan den hirugarren heriotza izan da Leringoa. Igandean, Lodosan, 79 urteko gizon bat hil zen autoarekin bidetik irtenda, eta asteartean, 63 urteko txirrindulari bat harrapatu zuen furgoneta batek Etxaurin.