Emausko Trapuketariek bertze areto bat zabaldu dute Iruñean: Dirdira. Arga karrikako Triki Traku azokaren ondoan ireki dute, eta, trapuketarien gainerako dendek bezala, bigarren eskuko objektuak saltzea izanen du helburu. Dirdira, halere, areto berezia izanen da, gaika antolatuko baitute salmenta, hau da, hilabetero, gai jakin baten inguruko objektuak jarriko dituzte salgai. Eskaintza, beraz, hilabetez hilabete aldatuko da. Aretoak azaroaren 20an ireki zituen ateak, eta Zentzuz kontsumitu izenburuko kanpaina abiatu zuen; Eguberriak hartu dituzte ardatz aretoaren lehen txanpan, herritarrak arduraz kontsumitzera deitzeko asmoz.
Emausko Trapuketariekin batera, Iruñeko Udaleko eta Iruñerriko Mankomunitateko ordezkariek parte hartu zuten azaroaren 20ko inaugurazioan. Goizean egin zuten, eta, ateak ireki bezain pronto, auzoko eta inguruko herritar anitz joan zen trapuketarien areto berria ezagutzera. Zentzuz kontsumitu kanpainaren barruan, Dirdirak Eguberriekin lotutako hamaika gauza bildu ditu: etxerako apaingarriak, bestetarako jantziak, mozorroak, jostailuak eta bertze. «Salgai jarritako guztia Emausko Trapuketariek jaso eta lehengoratu dute, prezio merkean saldu eta berriz erabiltzeko», nabarmendu dute trapuketariek.
Rakel Irizibar da erakundeko salmenten koordinatzailea, eta kontatu du lehengoratutako objektuak saltzeko modua aldatzeko gogoeta egin eta gero bururatu zitzaiela objektu horiek gai jakin baten inguruan biltzea, eta hilabetez hilabete, gai hori aldatuz joatea. Oraingo Eguberrietako kanpaina izanen da lehendabizikoa, eta datozen hiru hilabeteetako gaiak ere zehaztuak dituzte. Urtarrilean eta otsailean, pisura salduko dute dendako arropa guztia. Helburua da neguko hilabeteetan inor ez gelditzea berokirik gabe. Martxoan, berriz, Emausko Trapuketarien «altxorrak» hartuko dituzte ardatz, eta erakundeko kideek aurkitutako objekturik «bitxienak eta harrigarrienak» jarriko dituzte salgai.
Nafarroan, 1972tik
Martxan jarri zirenetik, trapuketariek ondare bilakatu dute bertzeek zabortzat daukatena. 1972. urtean ailegatu ziren Nafarroara, eta hasieran bezala, pertsonak jarduera ororen erdigunean jartzeko lan egitea dute helburu orain ere. «Sufriarazten digun errealitatea aldatu nahi dugu», azpimarratu zuten 2022an, mende erdia bete zutenean. Trapuketariek garbi dute produkzioa dela egungo arazoetako bat, Dirdira aretoaren inaugurazioan azaldu dutenez. Izan ere, planetan bizi diren 8.000 milioi pertsonentzat urtean 150.000 milioi jantzi ekoizten dira, eta %80 zaborretara doa.
Emausko Trapuketarien Dirdira denda, Iruñeko Arga karrikan, azaroaren 20an. JAGOBA MANTEROLA / FOKU
Nafarroan, Emausko Trapuketariek hogei kamioi eta hamar furgoneta betetzen dituzte egunean. Jasotakoa lehengoratzeko prozesua Berriozarren hasten da, trapuketariek han duten planta nagusian. Objektuak sailkatzea da lehen lana, eta arropak, etxeko tresna elektrikoak eta bertzelakoak banatzea. Jasotakoa garbitu eta konpontzen dute, behar eta ahal izanez gero, eta salgai jartzen dute, herrialdean dituzten dendetan.
Egunotan, Zentzuz kontsumitu kanpainaren barruan, jostailuz betea izanen da Dirdira, zabaldutako azken aretoa. Trapuketariek oroitu dute jasotzen dituzten jostailu beliko guztiak bazter uzten dituztela. Erakundeko ordezkariek gehitu dute beren proiektuak helburu solidario bat baduela. Denda berri bat zabaltzen dutenean, etekinen zati bat helburu sozialetarako erabiltzen dute, eta oraingoan, Sudanen eta Haitin lanean ari den gobernuz kanpoko erakunde batek jasoko du dirua.