Nafarroako Volkswagenen 2026ko egutegia antolatzen hasi dira, eta atzo bilera izan zuen zuzendaritzak langile batzordearekin aldi baterako espedientearen baldintzez hitz egiteko. Landabengo fabrika auto elektrikoaren ekoizpenera egokitzeko lanetan murgilduta dago eta ezohiko egoera horrek 2026 erdialderaino iraungo du. Uda pasata, abuztuaren 24tik aurrera, hiru txandak itzuliko dira eta normaltasuna berreskuratuko du. Erritmo betean hasiko dira.
Fabrika egokitzeko lanek produkzioari eragin diote azken hilabeteetan eta hala jarraituko dute ekainera bitarte. Lehen bilera horretan zuzendaritzak egutegia aurkeztu die. Urtarriletik martxora, astelehenetik ostegunera ohi bezala lan egingo da, baina ostiralean bi txandak baino ez dute lan egingo eta ostiral horietako batean, gainera, txanda bakarrak egingo du lan.
Apiriletik aurrera, egokitzapen lanak areagotuko direnez, produkzioari gehiago eragingo diote. Xafla lantegietako bat desmuntatu behar da auto elektrikora egokitzeko eta hiru hilabetez muntaketa lerro bakar batekin lan egingo dute Landabenen. Horrek lan erritmoari eragingo dio. Apiriletik ekainera, astelehen, asteazken eta ostiraletan bi txandek egingo dute lan; astearte eta ostegunetan, berriz, txanda bakar batek. Alta, txapa lantegiko langileen lan zama handituko da eta ez da baztertzen asteburuetan lan egitea.
Udan, lau asteko oporraldia izango dute, eta abuztuaren 24tik aurrera hiru txandak berreskuratuko ditu fabrikak. Azken bi urteetako egokitzapen prozesua atzean utzi, eta ohiko erritmo handiari ekin beharko diote orduan langileek. Bitarte horretan, bere bi modelo elektrikoak aurkeztuko ditu Volkswagenek. Ekainean, Skoda Epiq jaulkitzea espero da eta irailean Volkswagen ID.Cross.
Egutegiaren inguruko lehen blleratan, zuzendaritzak hurrengo urteko produkzio aurreikuspen bat aurkeztu ohi du. Oraingoan, baina, ez du zifrarik aurreratu. Egutegia produkzio estimazioari lotuta dagoenez, lehen bilera horretan aurreikuspena emateko premia azaldu zien LABek zuzendaritzako kideei eta «hurrengo asteetan» egingo dutela adierazi zieten. Dena den, aurkeztutako egutegi proposamenarekin 260.000 ibilgailutik gora ekoitziko direla uste dute sindikatuek.
Aurten, egokitzapen lanen eragina handiagoa izan da. Hiru hilabetez fabrika itxita egon da —urtarrilean eta udan— eta abenduan ere ateak itxiko ditu. Gainera, 66 eguneko aldi baterako espedientea hitzartu zen.
Txipen gatazka
Horrez gain, kezka dago mikrotxip eskasia egoteko arriskuaren aurrean. Zuzendaritzak ez du gai horri buruz hitz egin langile batzordearekin, baina Alemaniatik iristen diren albisteen arabera, Wolsburgeko egoitza nagusian ezinegona dago. Herbehereetako Gobernuak Nexperia txip ekoizlearen kontrola bereganatu berri du. Wingtech enpresa txinatarraren negozio adarra denez, Txinako Gobernuak Europako Batasuneko hainbat osagaien esportazioak blokeatu ditu, eta horrek hornidura katean kalteak eragin ditzake. Efe albiste agentziari baieztatu dio egoera horrek eragingo duela epe motzera.