Foruzaingoak jakinarazi duenez, atxilotu egin dute atzo goizaldean Iruñeko Mercaderes kaleko etxe batean gotortu zen gizona. Belosoko komisariara eraman dute, eta gaur dira epailearen esku uztekoak. Foruzaingoaren arabera, bikotekideari eskopeta batekin mehatxu egitea eta eraso egiten saiatzea leporatzen diote.

Poliziak 10:00 aldera jaso zuen etxebizitzara joateko abisua, atzo. Udaltzaingoak eta Foruzaingoak iritsi eta berehala jarri zuten martxan segurtasun operazio bat, eta Iruñeko Alde Zaharreko zenbait kale itxi zituzten, hala nola Estafeta, Kuria, Nabarreria eta Kaldereria. Etxebizitzara sartzea lortu zutenerako, baina, hutsik zegoen. Gizonak ihes egin zuen, eta gaur goizaldean atzeman dute. 

Foruzaingoaren arabera, gizonak mehatxu egin ondoren, etxetik alde egitea lortu zuen emakumeak, baina gizona jarraika ari zitzaion kaletik. Emakumea Hizkuntza Eskolara joan zen laguntza eske.