Eka 7, 20132013-06-07Beste albiste batzuk0

Gazteen lokalek ordutegi mugatuak izanen dituzte

Hemendik aurrera, Iruñeko gazteen lokalek ordutegi mugatua izanen dute, baita edukiera mugatua ere —tamainaren arabera—. Tokiko Gobernuaren Batzarrak aurkeztu du ordenantza berria, eta, testuan jasotzen duenez, hiriko lokalak 02:00ak arte egon daitezke irekita jaiegunetan, eta astegunetan, berriz, gauerdian itxi egin beharko dira.

Iruñeko Udalak badu hiriko lokalen errolda, eta, denera, 251 daude. Bizilagunen kexa ugari jasotzen dituzte lokalek, eta horregatik prestatu du udalak ordenantza berria. Hain zuzen ere, Arartekoak iradoki zion udalari gazteen lokalak arautzea. Juan Jose Etxeberria Iruñeko Udaleko Hirigintza zinegotziak gazteen lokalen "oinarrizko" ordenantza dela jakinarazi du. "Erabilera pribatua arautzea ez da batere erraza, batzuen eta besteen eskubideak errespetatu behar ditugulako", gaineratu du.

Prozedura parte hartzailea izan dela azpimarratu du Etxebarriak. Iruñeko Gazteriaren Etxeak parte hartu du, eta udaleko webgunean edonork iruzkinak egiteko aukera izan du.

Hainbat debeku eta betebehar jasotzen ditu ordenantza berriak. Besteak beste, lokalek izan behar dute ur hornidura, konketa, komuna eta aireztapena. Horretaz gain, ordenantzak debekatzen ditu sukaldeak eta janaria prestatzeko edozein objektu. Jolas makinak baldin badaude, doakoak izan behar dute.

Esan bezala, ordutegi arau berria izanen dute lokalek, baina salbuespenak izanen dira San Fermin jaietan eta Eguberri egunean. Bi ospakizun horietan ez da egonen ordutegi mugarik. Gainerako egun guztietan, gazteen lokalak "itxita, erabili gabe eta hutsik" egon behar dute 00:00etatik 09:00etara —jaiegunetan 02:00etatik 09:00etara—. Lokalek edukiera maximoa ere izanen dute, eta tamainaren arabera arautuko dute.

251 lokal

Iaz zenbatu zituen Iruñeko Udalak lizentzia duten hiriko lokalak, eta, denera, 251 gazte lokal daude. Arrosadian dago lokal gehien, 86. Arrotxapean, 26; Txantrean, 26; Donibanen, 25; Sanduzelain, 19; Iturraman, 18; Azpilagainan, 18; Etxabakoitzen, 8; Mendillorrin, 7; Ermitagañan, 5; Alde Zaharrean, 5; Zabalgunean, 5.

Iruñeko Udalak, 2002 eta 2010 artean, 338 administrazio txosten ireki zituen; txosten horietatik 120 artxibatu egin ziren, gazteei baimenak emanez; beste 180 kasutan, gazteek lokalak utzi dituzte, edo udalak ixteko agindu du. Lizentziarik ez duten lokalak ere badira, eta horiek dira bizilagunen artean kexa gehien sortzen dituztenak. 2010ean 31 zigor txosten ireki zituen udalak; horietatik hemezortzi zigorrik gabe itxi ziren, eta hamahiruk 360 eta 1.000 euro arteko isunak jaso zituzten.

Eka 7, 20132013-06-07Asteko Gaiak0

2011tik bikoiztu egin dira AEB eta Koreako erromesak

Nafarroako Gobernuak jakinarazi dituen datuen arabera, azken urteetan bikoiztu egin dira Ipar Ameriketako eta Hego Koreako erromesak Nafarroatik igarotzen den Donejakue bidean. Antza, AEBetako The Way (Bidea) filmak eta Hego Koreako idazle Kim Hyo Sumen nobelek zerikusi zuzena dute erromesen igoeran. Esaterako, 2004an, Hego Koreako hemezortzi erromes erregistratu ziren; 2012an, berriz, 2.500. Bestalde, Ipar Ameriketako herritarren kasuan —AEB eta Kanadakoak—, 2012an 3.046 erregistratu ziren Orreagako aterpean, duela bi urte baino bi aldiz gehiago. Orduan, 1.462 erregistratu ziren. Azken datuen arabera, 57.593 lagun igaro ziren iaz Orreagatik.

Mai 31, 20132013-05-31Beste albiste batzuk0

“Ikasketak baditugu, baina ez dugu lanik; horregatik gaude hemen”

Egoera ekonomikoak behartuta, gazte askok hartu dute atzerrirako bidea, eta kanpoan aurkitu dute Euskal Herrian topatu ez dutena: lana. Gazte horietako bat da Andrea Zuñiga (Zizur Nagusia, 1988). Urtarrilean joan zen Edinburgora (Eskozia) mutil-lagunarekin, eta, dagoeneko, lana lortu du.

"Mutil-laguna langabezian zegoen, eta nik aldaketa behar nuen, esperientzia berriak izan". Horrek guztiak bultzatuta abiatu zen Ibañez Eskoziara, baina baita ingelesa hobetzeko ere. Erizaina da Ibañez, baina ez du lanik topatu Nafarroan. Aukera gutxi daudela dio, eta murrizketen ondorioz egoera "ezin makurragoa" dagoela. Berak zortea izan du Edinburgon, eta hotel bat garbitzen aritzen da. Hor hasi baino lehenago, hala ere, ingelesa ikasten aritu zen. "Hona iritsi nintzenean, pentsatzen nuen ingelesez banekiela, baina eskoziar batekin hizketan hasi bezain pronto, konturatu nintzen ez nekiela ezer. Azentu oso itxia dute hemengoek". Orain, lankideekin praktikatzen eta hobetzen du.

Ez da euskal herritar bakarra Edinburgon, ezta nafar bakarra ere. Hark jarraitutako bidea egin dute askok, eta gaztelera eta euskara nonahi entzuten dira hirian. Gehienak arrazoi berarengatik joan dira: lan etorkizun oparoaren bila. Eta Ibañezek uste du aukera ezin hobea dela hizkuntza ikasteko, nahiz eta ikasi dutenarekin zerikusirik ez duten lanetan aritu. "Horrela, behintzat, denbora aprobetxatzen dugu. Ikasketak baditugu, baina ezin lanik aurkitu gure herrialdean. Horregatik gaude hemen". Gehienak denboraldi baterako joaten dira, eta Edinburgo aukeratzen dute, ez dagoelako oso urrun. Ibañezek ez daki noiz itzuliko den; hasieran, itzultzeko eguna zuen, baina gauzek ongi jarraitzen badute, han geldituko da. "Giro handia du hiriak, eta oso turistikoa da. Hortaz, sektorean lan egiteko aukerak daude".

Gustatzen zaio hiria. Xarma handia du, eta eraikin zaharrak oso ongi zaintzen dituzte. "Erdi Aroko hiria dirudi, gaztelu asko dituelako". Egun osoan, kalean giroa dago, eta hiri "alaia" iruditzen zaio. "Klima hain gogorra izan arren, jendea ez da etxean geratzen. Batez ere eguzkia ateratzen denean, lorategiak bete egiten dira". Lau urtaroak goiz bakar batean ikusi ditu Ibañezek, adibidez. Eta harrituta geratu da uda eta neguko argi orduekin: "Neguan, ia erabateko iluntasuna dago, eta, udan, alderantziz; aldaketa handia da".

Bigarren eskuko denda asko daude Edinburgon. "Nafarroan ez bezala, ohitura handia dute hemen gauza zaharrak saltzeko eta erosteko". Adibidez, igande guztietan, bigarren eskuko azoka erraldoia antolatzen dute lur azpiko aparkaleku batean. Jendeak garajeko leku bat alokatzen du, eta denetarik saltzen dute; oso merke, gainera. "Arropa, liburuak, bitxiak, etxeko tresnak... Denetarik dago, eta izugarria da ikustea zenbat jende joaten den".

Hilabete hauetan, bidaiatzeko denbora izan du Ibañezek. Eskoziako mendietara joan da —Highlands—, eta izugarri gustatu zaizkio. Laku asko daude, eta gazteluek paisaia ederrak sortzen dituzte.

"Adeitsuak, baina ez adiskidetsuak". Horrela definitu ditu eskoziarrak Ibañezek. Haiekin gertuko harremanak egitea kostatzen zaio, eta beste atzerritarrekin ibiltzen da. "Hasieran, saiatzen ginen sorterriko jendearekin elkartzen, ingelesez mintzatzeko, baina askoz errazagoa da atzerritarrekin ibiltzea. Egoera berean daude, eta elkar laguntzen dugu".

Heldu den urtean eginen dute Eskozian independentziaren erreferenduma —2014ko irailaren 18an—, eta egun historikotzat jo du Ibañezek. "Jendeak gero eta gehiago hitz egiten du gaiari buruz, arrazoi ekonomikoengatik, ideologikoengatik edo lurraldekoengatik. Sumatzen da eguna gertu dagoela". Hala ere, ez du ikusi giro berezirik. "Guztiaren gainetik, hemengoak eskoziarrak dira. Beste kontu bat da independentzia nahi duten edo ez". Ohiturez eta ikurrez mintzatu da Ibañez. Egunero ikusten ditu kilta —eskoziar gona— daramaten gizonak kalean, eta, batez ere, ospakizunetan eta errugbi partidetan janzten dute. Eskoziar liberak dira herrialdeko beste ikurra. Izan ere, berezko billeteak dituzte, eta, Ingalaterran osoan onartzen badira ere, gehienbat Eskozian erabiltzen dituzte. Libera esterlinen balio bera dute.

Ingelesen eta eskoziarren artean "lehia" dagoela konturatu da Ibañez. "Eskoziarrei ez zaie gustatzen ingelesak direla esatea; beren sustraiak oso errotuak dituzte". Gainera, ingelesak "serioagoak" direla uste du Ibañezek. "Ez dute hainbeste girorik". Aukera izan zuen errugbiko Sei Nazioen torneoko partida bat ikusteko, eta "ahaztezina" izan zela dio Ibañezek. "Izugarria izan zen giroa, eta, batez ere, Eskoziaren ereserkia abestu zutenean". Eskoziarren ohituren artean, garagardoarena aipatu du Ibañezek. Izan ere, "edozein egunetan eta edozein momentutan", jendea pubetara joaten da garagardoa edatera.

Mai 31, 20132013-05-31Beste albiste batzuk0

Sanferminetako museoan lau milioi euro gastatu direla dio Barkosek

Iruñeko sanferminetako museoa ezerezean gelditua dela eta UPNk lau milioi euro gastatu dituela salatu du Uxue Barkos Iruñeko Udaleko GeroaBaiko bozeramaileak. Joan den astean behin betiko proiektua baztertzea erabaki zuen gobernu batzordeak; izan ere, krisiak egitasmoa kolokan jarri du behin eta berriz, eta azkenean alde batera utzi dute Iruñeko jaien inguruko proiektua.

GeroaBaik sarri kritikatu ditu sanferminetako museoaren inguruko gorabeherak. "Oraindik ere inork ez du azalpenik eman gai honen inguruan, baina Iruñeko herritarroi lau milioi euro kostatu zaigu azkenean belardi bat izanen dena", esan du Barkosek. Horregatik auditoria bat eskatu du, Iruñeko Udalak urte hauetan guztietan ordaindutakoaren berri izateko. Barkosek gogorarazi duenez, UPNren legegintzaldiaren "proiektu izarra" zen sanferminetako museoa, eta alderdi beraren kudeaketa txarrak hondoratu du proiektua. "Iruzur hutsa izan da guztia".

Media Luna parkean 1.500 metro koadroko orube bat du udalak. Han egin nahi zuen museoa, baina orain beste proiektu batzuk aztertzen ari da bertan egiteko. Seguruenik txakurrentzako eremu bat izanen da. Txakur jabeentzako esparru ireki bat, animaliekin bertara joateko aukera izan dezaten.

Mai 31, 20132013-05-31Beste albiste batzuk0

Obrengatik hegala mugitzen dela onartu du CHE-k

"Beti egon dira mugimenduak Esako urtegian, eta euriteen eraginez mugitzen da urtegiko eskuin hegala". Hori esan zuen otsailean Ebroko Ur Konfederazioak, mugimenduei garrantzia kentzeko. Hala ere, orain jakin da erakundeak berak onartzen duela Esako urtegiaren handitze lanek eskuineko hegalaren mugimenduak eragiten dituztela. Ebroko Ur Konfederazioak urtarrilaren 9an egindako barne txosten batean azaltzen da baieztapena. "Eskuineko hegala zimentatzeko eta egonkortzeko lanek eragin dituzte mugimenduak", dio txostenak.

Joan den udan sumatu zuten eremu horretako mugimendua lehen aldiz —50 metroko sakoneran—, baina abendura arte ez zuten erabaki irristatzeari aurre egiteko neurriak hartzeko beharra zegoela.

Horretaz gain, txostenean Ebroko Ur Konfederazioak dio eskuin hegalaren mugimenduek Esako etxebizitzen hondatzea eragin dezaketela. Otsailean Esako bi urbanizazio hustu zituzten, baina Ebroko Ur Konfederazioak esan zuen "badaezpadako" neurria izan zela. Gainera, abenduan urtegiaren larrialdietako plana zero mailatik —apalenetik— batera igotzea erabaki zuten, baina Ebroko Ur Konfederazioak ez zien herritarrei jakinarazi hartutako neurriaz. Astean bi zentimetro mugitzen da eskuineko hegala, eta batez beste, urtean bi metro higatuko da eremu hori adituen arabera.

Zangoza hutsarazi

Azken asteetan Antonio Casas geologoa Esako urtegiaren arriskuaz mintzatu da. Casasek lehenbaitlehen Zangoza, Esa eta inguruko herriak hutsarazi behar direla esan du, eta "berehalako arriskuaz" ohartarazi du. "Egoera ez da arriskutsua, dramatikoa da. Eta ez dut nik bakarrik esaten, Ebroko Ur Konfederazioak egindako txostenek ere hala diote". Izan ere, Casasek Esako hegalaren material ez egonkorrei buruz hitz egiten du, eta hori ere jasotzen du Ebroko Ur Konfederazioak egindako txostenean. "Esako flyschak zonaldea ahultzen du", azaldu du geologoak.

Dena den, Ebroko Ur Konfederazioak "alarmistatzat" jo du Casasek esan duena. "Esa handitzeko lanek egonkortasuna ekarriko dute urtegian", ziurtatu du.

Mai 31, 20132015-04-23Asteko Gaiak0

Barcina Amancio Ortegarekin bildu zen otsailean Ultzaman

El Informador atariak jakinarazi duenez, joan den otsailaren 23an Yolanda Barcinak Amancio Ortega enpresariarekin afaldu zuen Zenotzeko zaldiketa klubean. Patxi Mangado arkitektoa eta Carlos Solchaga ekonomi ministro ohia ere bertaratu ziren. Ofizialki, ez da jakin zertaz hitz egin zuten afari horretan, baina diotenez, Barcinak Ortegari eskatu zion Itaroa merkataritza guneko dendak ez ixteko. Izan ere, iturri berberek esaten dute Inditex enpresak —Ortega buru da— La Morea eta Itaroako alokairuak berriz negoziatu nahi dituela bi merkataritza guneetan jarraitzeko. Horretaz gain, aipatu hedabideak aditzera eman du diskrezio osoz jokatu zutela bai Barcinak eta bai Ortegak.

Mai 31, 20132013-05-31Iritzia0

OLABERRIRENTZAKO JUSTIZIA ESKE

Hogei urte bete dira Atarrabiako Txuma Olaberriri gomazko pilota batek buruan jo zionetik. Lagun batekin Iruñeko Sarasate pasealekuan zegoela, Espainiako Poliziak jaurti zuen pilota hura. Gertakizun horren ondorioz, Olaberri larriki zauritu zen, eta garezurrean ebakuntza egin behar izan zioten erietxean. Ez zen erabat osatu inoiz. Hogei urte igaro diren arren ez dela justiziarik egin salatu dute dozena bat lagunek Atarrabian, joan den astean egindako elkarretaratzean.

Mai 31, 20132013-05-31Asteko Gaiak0

Bi urteko ibilbide malkartsua

Bi urte igaro dira Yolanda Barcinak foru hauteskundeak irabazi zituenetik. 2011ko maiatzaren 22ko gaua gozoa izan zen ordu arte Iruñeko alkate izan zenarentzat. Iruña Park hotelean txalo zaparraden artean hartu zuten alderdi kideek Barcina. Orduan onartu zuen "demokrazia aroko zortzigarren legegintzaldia korapilatsua" izango zela. Baina, uste baino korapilatsuagoa suertatu zaio. PSNrekin batera gobernatzeko ituna bertan behera geldituta, bakarrik dago gobernuan UPN. Horri, CAN auziaren itzala eta krisi ekonomikoaren eragina gehitu behar zaizkio. Batek baino gehiagok iraungitze data jarri dio Barcinaren gobernuari. Legegintzaldia amaitzea erdietsiko duen edo ez, hori da askok egiten duten galdera. Izan ere, beste bi urte falta dira 2015ean egingo diren foru hauteskundeetarako.

2011ko ekainaren 23an egin zen Yolanda Barcina Nafarroako presidente aukeratzeko osoko bilkura. 28 botoren bitartez —UPN eta PSNrenak— gehiengo absolutuz, erdietsi zuen gobernuburu izatea. Hala ere, bi alderdiak Nafarroa ulertzeko moduan ez zetozen bat. Ez zuten zer ikustekorik ez gizarte politikan ezta politika ekonomikoan ere. Dena den, Barcina pozik agertu zen, ziur zelako bi alderdiek Nafarroari "egonkortasuna" ematea lortuko zutela.

Ekinaren 21ean, UPN eta PSNk sinatutako akordioan jasotzen denez, Barcinak denera zortzi kontseilari izendatu zituen, tartean hiru PSNkoak. Roberto Jimenez, Anai Astiz eta Elena Torres ziren kontseilari sozialistak. Baina, hamabi hilabete nahikoak izan ziren Nafarroako Gobernuari "egonkortasuna" emango zion akordioa hausteko. Izan ere, 2012ko ekainaren 14an, gauerdian igorritako komunikatu baten bitartez, Roberto Jimenez "desleialtasunagatik" kargutik kentzen zuela jakinarazi zuen Barcinak. Astizek eta Torresek dimisioa eman zuten.

Ordurako, desadostasunak handiak ziren PSN eta UPNko kideen artean. 2011ko hauteskunde orokorretan Barcinak Mariano Rajoyri —orduan Espainiako Gobernurako presidente izateko PPko hautagaiari— babesa eman ostean hasi ziren lehenengo arraildurak sortzen.

Bi aste barru urtea beteko du UPNk gobernuan bakarrik. Aste honetan bertan esan du Barcinak: "PSNrekiko UPNk duen harremana ez da inolaz ere erraza, baina ez dago guztiz hautsita". Nafarroako presidenteak berak onartu du ezegonkortasun egonkorra duela gobernuak. Agerikoa da parlamentuan ez duela legealdi hasieran zuen babesa.

Krisi ekonomikoaren biktima

2008 inguruan krisi ekonomikoa hasi zenetik, Nafarroa atzeraldi ekonomikoan murgilduta egon da. Langabezia tasak 50. 0000 langaberen langa gainditu du, eta Nafarroako Gobernuaren kaudimen gaitasuna zeharo murriztu da. Hala, murrizketak egin dituzte, osasunean, hezkuntzan, gizarte zerbitzuetan... Esaterako, oinarrizko errenta gizarteratzeko errentak ordezkatu du. Hala, zailtasun ekonomikoengatik laguntza publikoa behar duten familiak laguntza horiek jasotzeko aukerak murritzagoak dira, betebeharrak zorroztu ostean. Hala, egun, 1.225 familia inguru daude inolako diru iturririk gabe.

Osasun eremuari dagokionez, krisi bati baino gehiagori egin behar izan dio aurre Barcinaren gobernuak eta hein berean Marta Vera Osasun kontseilariak. Legealdi hasieran jakinarazi zituzten hainbat proiektu izar: landa eremuko larrialdietako murrizketak, erietxeetako laborategiak batzeko proiektua eta ospitaletako jangelak pribatizatzeko asmoa.

Besteak beste, hiru asmo horien harira egindako manifestazio eta elkarretaratzeetan dozenaka lagunek hartu dute parte azken asteetan, eta osasun zerbitzu publikoak "deusezten" ari zirela egotzi diote. Veraren proiektu izarra zen landa eremuko larrialdi zerbitzuak moldatzeko legea. Hala ere, parlamentuan ez zen proposamena aurrera atera, PPNk soilik babestu zuelako. Dena den, ospitaleetako laborategi zerbitzua Iruñean zentralizatzea eta jangela zerbitzua pribatizatzea lortu du.

Ospitaleetako jangela zerbitzua pribatizatzeak polemika handia eragin du. Izan ere, zerbitzua kudeatzeko proiektua irabazi zuen Mediterranea de Catering enpresak, besteak beste Iruñeko Ospitaleen Gunean, kexa ugari izan ditu: janari txarra emateagatik, hotzak behar zuena bero zerbitzatzeagatik... Duela astebete, Verak jakinarazi zuen enpresaren aurkako zigor espedienteak martxan jarraitzen zuela.

Nafarroako Kontu Ganberaren ikerketa baten arabera, 2011z geroztik, Osasun Departamentuak herritar bakoitzeko egiten duen gastua murriztu egin da. Izan ere, duela bi urte Yolanda Barcina gobernura iritsi zenean, batez beste herritar bakoitzeko 1.612 euro gastatzen ziren osasun gaietan. Egun, ordea, 1.469 euro.

Baina gizarte mugimendua ez da izan Yolanda Barcinaren bidean arantza bakarra. Alderdian bertan ere arazo bat baino gehiago izan ditu. Izan ere, ez zuen batere ondo hartu Alberto Catalanek alderdiko buruzagitza eskuratzeko hautagaitza aurkeztu izana. Hala ere, martxoaren 17ko kongresuan, Barcinak bere ibilbide politikoko garaipenik estuena baina garrantzitsuena lortu zuen, alderdiko buruzagitza eskuratuta. Baina Catalanekin izandako borrokak zauri ugari eragin ditu. Izan ere, alderdiko kideen ia erdiak ez daude ados Barcinak hartutako bidearekin eta horrek luze gabe arazoak eragin diezaizkioke.

Zentsura moziotik indartuta

Nahiz eta martxoa hilabete zaila izan, apirilean indartuta atera zen Barcina. Izan ere, azken bi urteetan abian jarritako politikekin ados ez, eta Bildu eta Aralarreko parlamentarien aldeko botoekin Barcinaren aurkako zentsura mozioa jarri zuten martxan. Apirilaren 8an eztabaidatu zuten mozioa. PSNk abstentzioaren alde egin ostean, alderdi abertzaleen egitasmoak ez zuen behar beste babes jaso. "Ez dago ni buru naizen gobernuaren alternatiba izan daitekeen beste gobernurik", adierazi zuen orduan Barcinak pozik. Hala ere, epe motzean sor daitezkeen beste aukera batzuk mahai gainean utzi zituen.

Ziurrenik, Barcinarentzat atakarik estuena CAN auziak eragin dio. Nafarroako Kutxan UPN kideek jasotzen zituzten diru sariek polemika piztu dute. Antza, Nafarroako Kutxa Banca Civicaren barruan zegoela, 2010. urte hasieratik berritutako estatutuetan, ordezkari politiko guztiak CANeko gobernu organoetatik atera ziren. Baina estatutu horietan, Nafarroako Gobernuko eta Iruñeko Udaleko ordezkariek parte hartuko luketen Erakunde Sortzaileen Batzordea aipatzen zuen, baina ez Batzorde Iraunkorra. Ez zen publikoa, eta batzorde iraunkor horretan lau politikari biltzen ziren —Enrique Maia, Miguel Sanz, Alvaro Miranda eta Yolanda Barcina—. Lehenengo hirurak auzipetuta daude Enrique Goñi Nafarroako Kutxako presidentearekin batera. Barcina, ordea, ezin da auzipetu foruduna delako.

Orain, jakina da uda aurretik ez dela mugimendu politikorik izango. Beraz, litekeena da Barcinaren legealdia Nafarroako Kutxaren auziaren garapenaren menpeko izatea. Inkesta baten arabera, Nafarroako biztanleen %40k herrialdeko egoera politikoari "oso txarra" dela irizten diote. Ez PSNk ez UPNk ez dute hauteskundeak aurreratzeko asmorik. Oraingoz, Barcina tinko ageri da, orain arte presidente gisa ibilbide malkartsua izan duen arren.

Mai 31, 20132013-05-31Iritzia0

Auzolana solasgai

Orain dela egun batzuk Leitzan izan ginen, auzolanari buruzko solasaldi batean, Kultur Aroaren baitan. Gaiari buruz teoria-mailan ikasi duguna azaltzen hasi orduko, solaskideen gogoa piztu eta euren ahotik aditu genituen garai ez hain urrun bateko biz...